*..ضاقت فيني الدنيا..*

بسم الله الرحمن الرحيم


رمضان قرّب يزورنا , راح يبقى عندنا ضيف لمدة 30 يوم او 29 !...

طلّة رمضان لنا , يعني رحمه , قرب من ربي , فرصه نعتق من النار ونروح للجنه..
مانبي رمضان يفوت علينا هالسنة نبي نبدا حياة جديده , وكلنا دايم نوعد أنفسنا بهالكلمه ونقول
رمضان السنه هذي بتوب فيه , وبصلي الصلاة في وقتها , وبوصل أرحامي وبسوي وبسوي ..

يمر رمضان علينا , ونزيد معاصي اكثر واكثر ..
نشوف مسلسلات بالهبل , ونسمع اغاني وطرب لا يوصف .. ونضيّع علينا أثمن فرص ..

نسينا ان كل شي مضاعف فيه ولما يخلص نحس بضيقه وندم وحسره لأننا ماسوينا شي يرضي ربنا فيه ,
خلطنا السيئه بالحسنه وما تلذذنا به أبدا : (
ولما يجي أحد ينصحنا نقول بلا عقد نفسيه خلنا ننبسط ,, وربك غفور رحيم !..

صح ربي غفور ورحيم .. بس يبي وصلنا ..
صح ربي صبر علينا ولا عذبنا , نعصيه ونجاهر بالخطأ , ومع ذلك ما فضحنا وستر علينا !
صح ربي انعم علينا نعم كثيره , ومع ذلك كل يوم يزيدنا واحنا نبعد عنه !
صح ربي وسّع علينا بدنيّتنا , ومع ذلك نضيق على انفسنا بالمعاصي والذنوب ..
ونقول ليه ياربي حزينين .. ليه ياربي تعبتنا من هالحياة .. ؟ ليه ياربي انظلمنا الى متى بنعاني ياربي ..؟!
ابي اموت ياربي فكني من هالحياة ..

ونروح نلجأ للأغاني الحزينه ونزييد ضيق واختناق , وتسّود الدنيا بعيوننا ..
وبعدين نقول الدنيا ماتسوى ونروح نشوف لنا فلم ,, ونزيد كئابه !

مهما سوينا ومهما كابرنا نبقى ناس ضعيفه بحاجه لخالقها ولرجعة ربها ..

ولكل شي بداية ..

رمضان , مافيه أجمل من أيامه .. وهي الي تساعدك على قربك من ربك
صلاة مفروضه , وقرأن , ودعاء واستغفار , وصلاة للتراويح والليل ,
يعني الجو جو إيماني .. والشياطين تكون مربطه ..
" ومافيه الا نفسك الاماره بالسوء , وضميّرك الحي .. ونزاع غريب اشوف مسلسلات واوسع صدري وأأجل عبادتي و
لا التزم بس قهر اخاف يفوتني شي ووو "

هنا نقولك .. لا تشّد على نفسك .. حلو انك تكون وسطي .. نظم يومك ,
وارضي ربك .. اقرأ قرأن .. مو لازم تقول بخلصه كل اسبوع .. اقرأ لو صفحتين كل يوم ,
خففف من الأغاني , طالع القنوات الدينيه فيه مواضيع روعه وبطابع شبابي غير ممل , قناة المجد , الرساله , اقرأ , بدايه , وغيرها ..

صلي بوقتها .. كل ماضاقت بك الدنيا صلّ ,, ادعي لربك ,, احضن الارض وانت ساجد وابكي على ربك وقول كل الي بخاطرك ..
ممكن دعوة صادقه من قلبك تغيّر حياتك بإذن الله ..

لا تسبق الأحداث ابد .. وتحط امامك عوائق للقرب من الله " وتقول انا عاصي ربي مايحبني كيف اقابل ربي ,,
لازم اصير مطوّع من اول من انولدت , انا ما انفع لشي "
بطل رسائل سلبيه , خذ عهد على نفسك من اليوم ورايح ماعاد فيه حزن , ولا ضيقه صدر , ولا فيه ذنوب كثيره ,,

انا بقرب من ربي , وبعبده , وبعيش حياتي ولا انحرم من شي ..
ولو كنت باقي على شي فيه عصيان لربي بخفف منه وبستخدم سياسة التأجيل لما اتخلص منه .. وادعيه انه يعييني واستغفره ,,

ماتتصور قد ايش ربي راح يفرح بعودتك له ,
اقرأ هالحديث من كل قلبك , تحس براحه عظيمه وفرحه :

" يا داود لو يعلم المدبرون عن شوقي لعودتهم ورغبتي في توبتهم لذابو شوقا إلي
يا داود هذه رغبتى فى المدبرين عنى فكيف محبتى فى المقبلين علي !! "

الله الله .. وفيه أعظم من هالبشرى ؟!
سبحانك ربي ما اعظمك ..



وهنا رد رباني لكل من يستحي من رفع يده لربه وهو عاصي مذنب اهلكته السيئات والحسره .. اه بس

" إني لأجدني أستحى من عبدي يرفع إلي يديه يقول يارب يارب فأردهما
فتقول الملائكة إلى هنا إنه ليس أهلا لتغفر له
فأقول ولكنى أهل التقوى وأهل المغفرة أشهدكم إنى قد غفرت لعبدى "


"جاء فى الحديث:
إنه إذا رفع العبد يديه للسماء وهو عاصي فيقول يارب
فتحجب الملائكة صوته فيكررها يارب فتحجب الملائكة صوته فيكررها يارب فتحجب الملائكة صوته
فيكررها فى الرابعة فيقول الله عز وجل الى متى تحجبون صوت عبدى عنى؟؟؟
لبيك عبدى لبيك عبدى لبيك عبدى لبيك عبدى"

بعد ماشفنا رحمة ربي ولطفه فينا وحبه لعباده ,, ليه مانرجع له ..
ليه ما نحاول نغيّر نمط حياتنا بدل ما عداد السيئات شغال , نخليه على الحسنات وننبسط بهالحياة , وربي راضي علينا ..

نعرف ربي في الرخاء عشان يعرفنا بالشده لاضاقت بنا الدنيا ورفعنا يدنا له واستجاب لنا .. جزاءً لقربنا منه
دعوة صادقه من كل قلبي خلونا نحاسب أنفسنا ,
صدقوني بنشوف سعادة عمرنا ماحلمنا فيها , وبنشوف نعيم في الدنيا وبالأخره بإذن الله ..

يكفي بعد , النفس تعبت
والموت قدامنا , ونبي نستعد له , والقيامه قريبه
نبي نلغي كلمة مطوع الي كثير صارو يكرهون الدين بسببهآ ولأسباب خاصه في عقولهم ..
مانبي نكون مطاوعه بس قريبين من ربي , عشان تتبارك حياتنا ويصير لنا قيمة بهالدنيا ,

نبي نخفف اغاني , نبي نوصل أرحامنا , ونسعى للخير ونتصدق حتى لو بشي بسيط ,
نبي الابتسامه ما تفارقنا , نبي نعيش حياتنا على الأخر , بس فيه عقل وقلب ايماني يحكمنا ,
نبي نبرّمج حياتنا برضا وقناعه !

دعوة لكل من كره حياته , يقرب من ربه , يصلي ركعتين , ويدعي فيه بكل شي نفسه فيه !

لـِنجعل رمضان نقطة انطلاق وبرمجة جديده لحياة بدون معاصي وضيقه !

منقــــــــــــــــــول