بعض إتصالات خلق الله تدوشني
وش بعضها ! .. لا قسم بالله أكثرها
من بعد ما جا إتصال بجد عيّشني
حاله غريبة ولا كيف أفسرها !
فديتها صوتها من جد ينعشني
فخامته من تمر إذني تعطرها
إللي إلا من حكت كنها توشوشني
رقة .. نعومة .. ذررابة .. صعب أصورها
إسمي بفمها ورب البيت يخرشني
(لبية) تطلع غصب لو ما أحضّرها
الموت لو قالت إسمي بعد (واحشني)
أضيع منها وهي عمدا تكررها
أحيان أسوّي مطنشها وتكفشني
ترسل رساله : (وحشتك ؟) ما أعبّرها
أربع ثواني وأحس بشي رابشني
وأدق .. وترد .. وأتنهّد .. وأبادرها :
(لو ما وحشتيني إنتي من بيوحشني !
لعيونك إنتي جميع الناس حاظرها
تدرين حتى الرسايل منك تربشني
لا يابعد ماضي أحلامي وحاضرها
كل إتصالات خلق الله تدوشني
بس إتصالاتك إنتي .. جد أقدرها )
|
|
| محمد عويضة |
الرئيسية 
